KONFERENZA STAMPA

Christine Lagarde, President tal-BĊE,
Luis de Guindos, Viċi-President tal-BĊE

Frankfurt am Main, 11 ta’ Settembru 2025

Il-wara nofsinhar it-tajjeb, il-Viċi-President u jien nilqgħukom għal din il-konferenza stampa.

Il-Kunsill Governattiv illum iddeċieda li jżomm it-tliet rati ewlenin tal-imgħax tal-BĊE fl-istess livell. L-inflazzjoni bħalissa tinsab f’madwar il-mira fuq terminu medju tagħna ta’ tnejn fil-mija u l-valutazzjoni tagħna tal-prospettiva tal-inflazzjoni tibqa’ ġeneralment l-istess.

It-tbassir il-ġdid tal-persunal tal-BĊE jippreżenta stampa tal-inflazzjoni simili għal dik imbassra f’Ġunju. Il-persunal issa jbassar li l-inflazzjoni globali se tilħaq medja ta’ 2.1 fil-mija fl-2025, 1.7 fil-mija fl-2026 u 1.9 fil-mija fl-2027. Għall-inflazzjoni bl-esklużjoni tal-enerġija u l-ikel, il-persunal jistenna medja ta’ 2.4 fil-mija fl-2025, 1.9 fil-mija fl-2026 u 1.8 fil-mija fl-2027. L-ekonomija hija mbassra li se tikber b’1.2 fil-mija fl-2025, riveduta ’l fuq miż-0.9 fl-mija mistennija f’Ġunju. It-tbassir tat-tkabbir għall-2026 issa huwa kemmxejn aktar baxx, b’rata ta’ 1.0 fil-mija, filwaqt li t-tbassir għall-2027 jibqa’ l-istess b’rata ta’ 1.3 fil-mija.

Aħna ddeterminati li niżguraw li l-inflazzjoni tistabbilizza fil-mira tagħna ta’ tnejn fil-mija fuq perjodu ta’ żmien medju. Se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospettiva tal-inflazzjoni u r-riskji ta’ madwarha, fid-dawl tad-data ekonomika u finanzjarja li tidħol, kif ukoll id-dinamiċi tal-inflazzjoni prinċipali, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Id-deċiżjonijiet meħuda llum huma spjegati fi stqarrija għall-istampa disponibbli fis-sit web tagħna.

Issa se niddeskrivi f’aktar dettall kif naraw li se jiżviluppaw l-ekonomija u l-inflazzjoni, u mbagħad se nispjega l-valutazzjoni tagħna tal-kundizzjonijiet finanzjarji u monetarji.

Attività ekonomika

L-ekonomija kibret b’0.7 fil-mija f’termini kumulattivi matul l-ewwel nofs tas-sena, minħabba r-reżiljenza tad-domanda domestika. Ix-xejra trimestrali wriet tkabbir aktar b’saħħtu fl-ewwel trimestru u tkabbir aktar dgħajjef fit-tieni trimestru, li tirrifletti parzjalment frontloading inizjali tal-kummerċ internazzjonali b’antiċipazzjoni taż-żidiet mistennija fit-tariffi u mbagħad it-treġġigħ lura ta’ dak l-effett.

L-indikaturi tal-istħarriġ jissuġġerixxu li kemm il-manifattura kif ukoll is-servizzi se jkomplu jikbru, li huma sinjal ta’ xi momentum sottostanti pożittiv fl-ekonomija. Anki jekk id-domanda għax-xogħol qiegħda tbatti, is-suq tax-xogħol jibqa’ sors ta’ saħħa, bir-rata tal-qgħad timmarka 6.2 fil-mija f’Lulju. Maż-żmien, din għandha tagħti spinta lill-infiq mill-konsumaturi, speċjalment jekk, kif previst fit-tbassir tal-persunal, in-nies ifaddlu inqas mill-introjtu tagħhom. L-infiq mill-konsumaturi u l-investiment għandhom jibbenefikaw mit-tnaqqis li għamilna fil-passat fir-rati tal-imgħax li jiġi rifless fil-kundizzjonijiet tal-finanzjament. L-investiment għandu jkun mirfud ukoll minn infiq sostanzjali tal-gvern fuq l-infrastruttura u d-difiża.

It-tariffi ogħla, l-euro aktar b’saħħtu u ż-żieda fil-kompetizzjoni globali huma mistennija li jżommu t-tkabbir lura għall-kumplament tas-sena. Madankollu, l-effett ta’ dawn ix-xejriet negattivi fuq it-tkabbir għandu jbatti fis-sena d-dieħla. Filwaqt li l-ftehimiet tal-kummerċ reċenti naqqsu b’xi mod l-inċertezza, l-impatt ġenerali tal-bidla fl-ambjent tal-politika globali se jsir ċar biss maż-żmien.

Il-Kunsill Governattiv iqisha kruċjali li jsaħħaħ b’mod urġenti iż-żona tal-euro u l-ekonomija tagħha fl-ambjent ġeopolitiku preżenti. Il-politiki fiskali u strutturali għandhom jagħmlu l-ekonomija aktar produttiva, kompetittiva u reżiljenti. Sena wara l-ħruġ tar-rapport ta’ Mario Draghi dwar il-futur tal-kompetittività Ewropea, jibqa’ essenzjali li nsegwu r-rakkomandazzjonijiet tiegħu b'aktar azzjoni konkreta u li naċċeleraw l-implimentazzjoni tiegħu, b’mod konformi mal-pjan direzzjonali tal-Kummissjoni Ewropea. Il-gvernijiet għandhom jagħtu prijorità lil riformi strutturali li jsaħħu t-tkabbir u l-investiment strateġiku, filwaqt li jiżguraw finanzi pubbliċi sostenibbli. Huwa kritiku li titlesta l-unjoni tat-tfaddil u tal-investimenti kif ukoll l-unjoni bankarja, bi skeda ambizzjuża, u li jiġi stabbilit malajr il-qafas leġiżlattiv għall-introduzzjoni potenzjali tal-euro diġitali.

Inflazzjoni

L-inflazzjoni annwali tibqa’ qrib il-mira tagħna, hekk kif żdiedet kemmxejn għal 2.1 fil-mija f’Awwissu minn 2.0 fil-mija f’Lulju. L-inflazzjoni tal-prezzijiet tal-enerġija kienet ta’ -1.9 fil-mija, wara -2.4 fil-mija f'Lulju, filwaqt li l-inflazzjoni fil-prezzijiet tal-ikel naqset għal 3.2 fil-mija minn 3.3 fil-mija. L-inflazzjoni esklużi l-enerġija u l-ikel baqgħet kostanti b’rata ta’ 2.3 fil-mija. L-inflazzjoni tas-servizzi naqset kemmxejn għal 3.1 fil-mija, minn 3.2 fil-mija f'Lulju, filwaqt li l-inflazzjoni tal-prodotti baqgħet l-istess b’rata ta’ 0.8 fil-mija.

L-indikaturi tal-inflazzjoni prinċipali jibqgħu konsistenti mal-mira tagħna ta’ tnejn fil-mija fuq terminu medju. It-tkabbir sena wara sena fil-kumpens għal kull impjegat kien ta’ 3.9 fil-mija fit-tieni trimestru, tnaqqis minn 4.0 fil-mija fit-trimestru preċedenti u 4.8 fil-mija fit-tieni trimestru tas-sena li għaddiet. L-indikaturi li jħarsu ’l quddiem, inkluż l-indikatur tal-pagi u l-istħarriġ dwar l-aspettivi tal-pagi tal-BĊE, jissuġġerixxu li ż-żieda fil-pagi se tkompli timmodera. Flimkien mal-gwadannji fil-produttività, dan se jgħin biex jitrażżnu l-pressjonijiet tal-prezzijiet domestiċi, anki hekk kif il-profitti jirkupraw minn livelli baxxi.

Hekk kif inħarsu ’l quddiem, it-tbassir tal-persunal jara l-inflazzjoni tal-prezzijiet tal-ikel tonqos minn 2.9 fil-mija fl-2025 għal 2.3 fil-mija fl-2026 u l-2027. L-inflazzjoni fil-prezz tal-enerġija hija mistennija li tkompli tkun volatili, iżda tiżdied fuq l-orizzont tat-tbassir, parzjalment minħabba l-bidu tas-Sistema 2 ta’ Negozjar tal-Emissjonijiet tal-UE fl-2027. L-inflazzjoni esklużi l-enerġija u l-ikel hija mistennija li taqa’ minn 2.4 fil-mija fl-2025 għal 1.9 fil-mija fl-2026 u 1.8 fil-mija fl-2027, minħabba l-euro aktar b’saħħtu u t-tnaqqis fil-pressjonijiet tal-kost tax-xogħol.

Il-biċċa l-kbira tal-miżuri tal-aspettattivi tal-inflazzjoni fuq żmien itwal se jkomplu jkunu ta’ madwar 2 fil-mija, u dan jappoġġa r-ritorn sostenibbli tal-inflazzjoni għall-mira tagħna.

Valutazzjoni tar-riskji

Ir-riskji għat-tkabbir ekonomiku saru aktar ibbilanċjati. Filwaqt li l-ftehimiet tal-kummerċ reċenti naqqsu l-inċertezza, l-aggravar mill-ġdid tar-relazzjonijiet tal-kummerċ jista’ jkompli jrażżan l-esportazzjonijiet u jnaqqas l-investiment u l-konsum. Deterjorament fis-sentiment tas-suq finanzjarju jista’ jwassal għal kundizzjonijiet ta’ finanzjament aktar issikkati, averżjoni akbar għar-riskju u tkabbir aktar dgħajjef. It-tensjonijiet ġeopolitiċi, bħall-gwerra mhux ġustifikata tar-Russja kontra l-Ukrajna u l-kunflitt traġiku fil-Lvant Nofsani, jibqgħu wkoll sorsi ewlenin ta’ inċertezza. B’kuntrast, l-infiq ogħla milli mistenni fuq id-difiża u l-infrastruttura, flimkien ma’ riformi li jtejbu l-produttività, għandhom iżidu t-tkabbir. Titjib fil-kunfidenza tan-negozju jista’ jistimula wkoll l-investiment privat. Is-sentiment jista’ jintrefa’ ’l fuq u tingħata spinta lill-attività jekk it-tensjonijiet ġeopolitiċi jonqsu, jew jekk it-tilwim tal-kummerċ li jifdal jiġi solvut aktar malajr milli huwa mistenni.

Il-prospettiva għall-inflazzjoni tibqa’ aktar inċerta mis-soltu, bħala riżultat tal-ambjent tal-politika tal-kummerċ globali li għadu volatili. Euro aktar b’saħħtu jista’ jnaqqas l-inflazzjoni aktar milli mistenni. Barraminhekk, l-inflazzjoni tista’ tirriżulta li tkun aktar baxxa jekk tariffi ogħla jwasslu għal domanda aktar baxxa għall-esportazzjonijiet taż-żona tal-euro u dan iwassal sabiex il-pajjiżi b’kapaċità żejda jkomplu jżidu l-esportazzjonijiet tagħhom lejn iż-żona tal-euro. It-tensjonjiet fil-kummerċ jistgħu jwasslu għal volatilità akbar u averżjoni għar-riskju fis-swieq finanzjarji, u dan ikun ta’ piż fuq id-domanda domestika u b’hekk titnaqqas ukoll l-inflazzjoni. B’kuntrast, l-inflazzjoni tista’ tirriżulta ogħla jekk il-frammentazzjoni tal-ktajjen tal-provvista globali tgħolli l-prezzijiet tal-importazzjoni u żżid mal-limitazzjonijiet fil-kapaċità fl-ekonomija domestika. Żieda fin-nefqa fuq id-difiża u l-infrastruttura tista’ żżid ukoll l-inflazzjoni permezz tal-effett tagħha fuq perjodu ta’ żmien medju. L-avvenimenti ta’ temp estrem, u l-kriżi klimatika li qiegħda tiżvolġi b’mod aktar estiż, jistgħu jgħollu l-prezzijiet tal-ikel aktar milli huwa mistenni.

Kundizzjonijiet finanzjarji u monetarji

Sa mill-aħħar laqgħa tagħna ir-rati tas-suq fuq terminu qasir żdiedu, filwaqt li r-rati fuq terminu itwal baqgħu ġeneralment l-istess. Madankollu, it-tnaqqis li wettaqna fil-passat fir-rati tal-imgħax baqgħu jbaxxu l-kostijiet tat-teħid ta’ self mill-korporazzjonijiet f’Lulju. Ir-rata tal-imgħax medja fuq self ġdid lid-ditti naqset għal 3.5 fil-mija f’Lulju, minn 3.6 fil-mija f’Ġunju. Il-kost tal-ħruġ ta’ dejn ibbażat fuq is-suq baqa’ l-istess b’rata ta’ 3.5 fil-mija. Is-self lid-ditti żdied bi 2.8 fil-mija, kemmxejn aktar b’saħħtu milli f’Ġunju, filwaqt li t-tkabbir fil-ħruġ ta’ bonds korporattivi żdied għal 4.1 fil-mija minn 3.4 fil-mija. Ir-rata tal-imgħax medju fuq self ipotekarju ġdid ukoll baqa’ l-istess b’rata ta’ 3.3 fil-mija f'Lulju, filwaqt li t-tkabbir fl-għoti ta’ self ipotekarju żdied għal 2.4 fil-mija, minn 2.2 fil-mija.

Konklużjoni

Il-Kunsill Governattiv illum iddeċieda li jżomm it-tliet rati ewlenin tal-imgħax tal-BĊE fl-istess livell. Aħna ddeterminati li niżguraw li l-inflazzjoni tistabbilizza fil-mira tagħna ta’ tnejn fil-mija fuq perjodu ta’ żmien medju. Se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. Id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospettiva tal-inflazzjoni u r-riskji ta’ madwarha, fid-dawl tad-data ekonomika u finanzjarja li tidħol, kif ukoll id-dinamiċi tal-inflazzjoni prinċipali, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Fi kwalunkwe każ, aħna lesti li naġġustaw l-istrumenti kollha tagħna fi ħdan il-mandat tagħna biex niżguraw li l-inflazzjoni terġa’ lura għall-mira tagħna għal żmien medju u li nippreżervaw il-funzjonament bla xkiel tat-trażmissjoni tal-politika monetarja.

Issa lesti biex inwieġbu l-mistoqsijiet tagħkom.

Għall-kliem eżatt miftiehem mill-Kunsill Governattiv, jekk jogħġbok ara l-verżjoni bl-Ingliż.