Céard is íocaíochtaí meandracha ann?

Nuashonraithe an 24 Iúil 2025 (foilsithe den chéad uair an 26 Meán Fómhair 2016)

Tá cónaí orainn i ndomhan de theachtaireachtaí meandracha – ach fós féin bíonn suas le lá gnó iomlán ag teastáil chun íocaíocht leictreonach a chur i gcrích san AE. Agus má dhéantar íocaíocht leictreonach ag an deireadh seachtaine nó lá saoire poiblí, tá seans ann nach gcuirfear tús leis an íocaíocht don fhaighteoir go dtí an chéad lá gnó eile.

Le híocaíochtaí meandracha, cuirtear an t-airgead aistrithe ar fáil i gcuntas an fhaighteora laistigh de chúpla soicind, 24 uair an chloig sa lá, 365 lá in aghaidh na bliana. Tháinig soláthraithe seirbhíse íocaíochta na hEorpa ar chomhaontú maidir le sraith choiteann rialacha agus caighdeán chun íocaíochtaí a dhéanamh – an Scéim Aistrithe Creidmheasa Mheandraigh SEPA.

Cad é SEPA?

Seasann SEPA do Limistéar Aonair d'Íocaíochtaí Euro. Cén sprioc atá ag SEPA? Cuirfidh SEPA ar chumas do gach duine íocaíocht in euro a dhéanamh le haon duine eile áit ar bith in Eoraip, chomh héasca, chomh sábháilte agus chomh héifeachtúil céanna agus is féidir linn na híocaíochtaí sin a dhéanamh inár dtíortha féin, cibé acu íocaíochtaí trí dhochar díreach, cárta nó aistriú creidmheasa (meandrach).

Cothrom na Féinne a áirithiú d’íocaíochtaí meandracha

Cé go bhfuil úsáid íocaíochtaí meandracha ag fás go leanúnach, ní raibh rochtain chomhionann ag gach duine in Eoraip ar íocaíochtaí meandracha. Athraíodh seo leis an Rialachán maidir le híocaíochtaí meandracha. Ceanglaítear anois ar sholáthraithe seirbhíse íocaíochta an Aontais a chuireann aistrithe creidmheasa “rialta” in euro ar fáil an rogha íocaíochtaí meandracha a sheoladh agus a fháil in euro a thairiscint.

Faoin reachtaíocht seo, ní ceadmhach aon mhuirir a chuirtear i bhfeidhm a bheith níos airde ná na muirir is infheidhme i leith aistrithe creidmheasa rialta leis na gnéithe céanna agus a sheoladh tríd an mbealach céanna. Cuireadh na ceanglais i bhfeidhm chun a áirithiú go mbeadh íocaíochtaí meandracha ar fáil go forleathan do thomaltóirí agus do ghnólachtaí araon.

Cad iad na buntáistí a bhaineann le híocaíochtaí meandracha?

Le híocaíochtaí meandracha, is féidir leat íocaíochtaí meandracha in euro a sheoladh agus a fháil am ar bith, áit ar bith. I roinnt tíortha, is féidir leat íocaíochtaí meandracha a sheoladh trí d’fhón póca, rud atá cosúil le hairgead tirim ó thaobh luais agus áisiúlachta de. Mar sin, má tá tú amach le cairde agus bille dinnéir á roinnt acu nó airgead á thabhairt ar iasacht agat do chara le haghaidh an tráthnóna, tá sé fós tapa agus éasca le déanamh. Mar sin féin, ní oibríonn formhór na réiteach sin laistigh de theorainneacha náisiúnta amháin agus ní féidir iad a úsáid chun íocaíochtaí a dhéanamh le húsáideoirí i dtíortha eile.

Sa réimse ríomhthráchtála, is féidir le híocaíochtaí meandracha deireadh a chur le riosca an díoltóra nach bhfaigheadh siad airgead. Gheobaidís an íocaíocht sula seolfaí na hearraí. Maidir le híocaíochtaí gnólacht le gnólacht, is féidir le híocaíochtaí meandracha feabhas a chur le sreabhadh airgid, é a dhéanamh níos éasca airgead a bhainistiú, íocaíochtaí déanacha a laghdú agus dlús a chur le híocaíocht agus réiteach sonrasc. Le híocaíochtaí meandracha, cuirtear ardán ar fáil le haghaidh nuálaíocht bhreise ag soláthraithe seirbhíse íocaíochta agus ag gnólachtaí araon, mar aon le héifeachtúlacht oibríochtúil mhéadaithe. Déantar cruthú réitigh íocaíochta dhigiteacha agus gnéithe breise a éascú le híocaíochtaí meandracha, rud a chuireann feabhas ar eispéireas úsáideoirí agus le hiomaíochas in earnáil na n-íocaíochta.

Cad é an ról atá ag an mBanc Ceannais Eorpach?

Tá BCE freagrach as sábháilteacht agus éifeachtúlacht na n-íocaíochtaí leictreonacha in euro. I bhfianaise an tsainchúraim sin, is príomhchuspóir de straitéis an Eurochórais maidir le híocaíochtaí miondíola í úsáid iomlán na n-íocaíochtaí meandracha. Is féidir le híocaíochtaí meandracha feabhas a chur ar athléimneacht agus uaththriail straitéiseach mhargadh íocaíochta na hEorpa tríd an spleáchas ar sholáthraithe seirbhísí neamh-AE a laghdú.

Ar mhaithe le nuálaíocht a chur chun cinn, táimid ag obair le hearnáil na n-íocaíochta chun comhaontú a dhéanamh maidir le sraith choiteann rialacha agus caighdeán agus deireadh a chur le haon bhacainní ar íocaíochtaí a dhéanamh ar fud thíortha an Aontais. Déanann BCE cathaoirleacht ar ghrúpa – an Bord um Íocaíochtaí Miondíola Euro – ina dtugtar le chéile ionadaithe soláthraithe agus úsáideoirí seirbhísí íocaíochta agus is mar aidhm ag an ngrúpa margadh na n-íocaíochta san Aontas a dhéanamh níos comhtháite, níos nuálaí agus níos iomaíche. Sainaithníonn an Bord tosaíochtaí comhchoiteanna agus cothaíonn sé gníomhaíochtaí a bhfuil mar aidhm leo aghaidh a thabhairt ar ilroinnt mhargadh na n-íocaíochtaí miondíola. Tá an Bord ar thús cadhnaíochta maidir le hobair ar íocaíochtaí meandracha uile-Eorpach ó 2014 agus tá siad ag déanamh faireachán ar dhul chun cinn agus úsáid íocaíochtaí meandracha ag éirí níos forleithne.

Chun é a éascú do sholáthraithe seirbhíse íocaíochta íocaíochtaí meandracha a chur ar fáil, d’fhorbair BCE seirbhís lenar féidir le soláthraithe íocaíochtaí a shocrú láithreach, go sábháilte agus de lá agus d’oíche. Seoladh an tseirbhís um Shocraíocht Íocaíochta Meandracha TARGET (TIPS) i mí na Samhna 2018 agus cuireann sé ar chumas soláthraithe seirbhíse íocaíochta na híocaíochtaí meandracha arna ndéanamh ag a gcustaiméirí le haon duine ar fud na hEorpa a phróiseáil.